Usa ka lolo ang namatay human pusila sa wala mailhi nga mga suspetsado samtang nagkugos sa iyang apo sa Purok 7, Barangay Bool, sa buntag sa Hunyo 28, 2025.
Ang biktima giila nga si Rodelito Tanyo, 42 anyos, nga taga-Toledo City apan nagpuyo na karon sa Bohol. Base sa imbestigasyon sa kapulisan, naglingkod ra si Tanyo sa kilid sa dalan uban ang iyang apo sa ilang tugkaran, dihang miduol ang duha ka mga lalaki nga nagsakay og motorsiklo nga nagsul-ob og helmet ug bonet.
Giingon nga nangutana pa ang usa sa mga suspetsado sa biktima, apan kalit lang kining nibunlot og pusil ug gipusil si Tanyo sa ulo. Patay dayon ang biktima sa dihang naigo. Maluwas hinuon ang apo nga iyang gikugos.
Human sa hitabo, dali nga misibat ang mga suspetsado padulong sa Barangay Dampas. Ang mga otoridad padayon nga nagtan-aw sa CCTV ug nangita sa posibleng mga testigo aron maila ug madakpan ang mga responsable.
Hangtod karon, padayon pa ang imbestigasyon sa kapulisan aron masayran ang motibo sa krimen.
I via Renante Socia Lada