Nakalas ang usa ka 62-anyos nga lalaki human malumos sa usa ka sapa sa Sitio Kawayan, Barangay Cambang-ug, Toledo City, pasado alas 11:50 sa buntag, Sabado, Hunyo 28, 2025.
Ang biktima giila nga si Heraclio Secretaria. Base sa inisyal nga imbestigasyon, misuway unta siya pagtabok sa sapa apan aksidenteng natagak sa bahin nga lalom ang tubig.
Sumala sa Toledo City Information Office, nasayran nga hubog ang biktima sa dihang nahitabo ang insidente. Wala kini ka kontrol sa iyang lihok ug posible nga maoy hinungdan sa iyang pagkahagsa.
Ang lawas ni Secretaria nakit-an ug narekober alas 2 pasado na sa udto sa mga residente ug otoridad nga nitabang sa pagpangita.
Padayon ang pahimangno sa mga otoridad nga mag-amping ug likayan ang pagtabok sa mga suba labi na kon hubog aron malikayan ang susamang insidente.
📸Toledo City PIO
I via Renante Socia Lada