Nabugtuan gyud sa kinabuhi ang usa ka lolo human na tumbahan sa mixer truck.
Ang aksidenti nahitabo pasado alas 9:00 kagahapon sa buntag, Marso 25, 2023, didto sa Purok 6, Barangay Totolan, Lungsod sa Dauis, Probinsya sa Bohol.
Ang biktima giila sa kapulisan sa Dauis Police Station nga mao si Elpidio Lupar, 61 anyos ang panuigon, nagpuyo rapud sa maong lugar.
Naila usab ang driver sa mixer truck nga mao si Carlomagno Deloy, 43 anyos ang panuigon, nagpuyo sa Barangay Cancatac, Lungsod sa Corelea, Bohol.
Sa imbestigasyon nga gihimo ni Police Staff Sergeant Rene Neneria, ang imbestigador sa maong aksidenti, nasayran nga ang maong mixer truck naghatod og mga semento aron ibuhos sa taytayan nga gitukod sa maong lugar.
Si Lupar ni giya ni Deloy sa pagparking sa mixer truck apan sa tantong atras niini naligas ang ligid og natumba nga paingon sa nahimutangan sa biktima.
Gisulayan unta sa pag tabang apan nabugtuan gyud sa kinabuhi ang biktima gumikan sa kabug-at sa maong truck. (Renante Lada)