Nadakpan sa kapulisan sa Poro, Cebu ang lima ka mananagat atol sa usa ka operasyon batok sa ilegal nga panagat sa kadagatan sa Barangay Western Poblacion niadtong nakalabay nga adlaw.
Matud sa Poro Municipal Police Station, nasakpan ang grupo samtang naggamit og “Buso” o gidili nga paagi sa pagpanagat, nga supak sa Municipal Ordinance No. 97-01 sa lungsod sa Poro. Ang mga nadakpan gikan sa lungsod sa San Francisco, Cebu ug apil niini ang usa ka menor de edad.
Narekober sa operasyon ang mga 15 ka kilo nga nagkalain-laing klase sa isda nga nagkantidad og ₱3,500, usa ka sakayan nga adunay compressor set nga gibanabanaang mobalor og ₱29,000, ug uban pang gamit sa pagpanagat nga nagkantidad og ₱5,000.
Gipasabot sa kapulisan nga padayon nilang palig-onon ang kampanya batok sa ilegal nga panagat aron mapanalipdan ang mga kahinguhaan sa dagat ug masiguro ang panginabuhian sa mga lehitimong mananagat. Ang mga nadakpan ug ang nakompiskar nga mga ebidensya gidala sa Poro Municipal Police Station alang sa hustong dokumentasyon ug pagpasaka sa angay nga kaso.
I via Renante Socia Lada