Nagsugod kagahapong adlawa, Nobyembre 20, ang tulo ka adlaw nga Capitol Surgical Mission nga naghatag og libre nga operasyon sa mata aron mabalik ang panan-aw sa mga pasyente nga adunay cataract ug pterygium sa Oslob District Hospital.
Ang inisyatiba gipatuman pinaagi sa panagtambayayong sa Cebu Provincial Government ug Department of Ophthalmology sa Vicente Sotto Memorial Medical Center (VSMMC).
Nagpasalamat si Capitol Piso Health Consultant Dr. Nikki Catalan sa suporta ug kooperasyon tali sa VSMMC ug Capitol, nga maoy nakapahimo sa maong medical mission.
Tumong sa programa ang paghatag og importante ug kinahanglanon kaayo nga operasyon alang sa mga pasyente nga dili maka-afford sa maong serbisyo kung walay tabang gikan sa gobyerno.
Aron masiguro ang kahupayan sa mga pasyente ug ilang pamilya samtang naghulat, mitabang usab ang Cebu People’s Action Center pinaagi sa paghatag og pagkaon, nga midugang og dugang pagtagad ug pag-atiman sa mga benepisyaryo.
Ang unang adlaw sa operasyon gipangulohan sa team sa ophthalmologists nga sila Dr. Jake Sebastian, Dr. Ulysses Joseph Yap, Dr. Kristianne Chyna Dabuet, ug Dr. Kezia Sucalit, kauban ang mga nars ug support team nga giilang sila Adelita Villegas, Carolyn Maun, ug Marivie Fabon.
Nanghatag usab ang opisyal ug staff sa Oslob District Hospital ubos sa pagdumala ni Dr. Jen ug Board Member Dr. Stanley Caminero, kauban ang mga volunteer, private supporters, ug personnel sa Cebu Province, nga nagtabang sa kalamposan sa unang adlaw sa medical mission.
Source: Cebu Province PIO
I via Renante Socia Lada