Hugot nang gipatuman sa Cebu Provincial Government ang usa ka ordinansa nga nagmando sa tanan quarry permit holders nga motanom og usa ka kahoy (tree seedling) matag usa ka cubic meter sa ilang gikuhang mineral ug quarry resources sulod sa ilang host ug silingan nga komunidad.
Niadtong Nobyembre 17, nagpagula si Governor Pamela Baricuatro og memorandum nga nagmando kang Provincial Environment and Natural Resources Office (PENRO) Chief Rodel Bontuyan nga ipatuman ang Section 3(c)(2) sa Provincial Ordinance 2016-21, nga nagmugna og dugang division, sections, ug permanent positions sa PENRO.
Gipahimangnoan kini tungod sa bag-ong pagbaha, soil erosion, ug landslide nga nahitabo sa Cebu tungod sa sunod-sunod nga bagyo karong buwana, nga nagpamatuod sa panginahanglan sa mas lig-on nga environmental safeguards sa mining ug quarry operations.
Gawas sa mandatory tree planting, ang ordinansa nagmando usab sa mga quarry permittee nga mosunod sa mosunod:
a) Mihatag og healthy endemic ug fruit-bearing seedlings ngadto sa provincial nurseries.
b) Mupatukod og sakto ug igo nga drainage canals sulod sa ilang project sites samtang valid pa ang ilang permit.
Ang pagtuman sa mga rekisitos susihon una pa i-renew ang ilang permit.
Kini nga inisyatiba nagdugang kusog sa mas lapad nga programa sa gobernador batok sa flash floods, lakip na ang integrated water management sa Cebu. Mahinumduman nga pagkahuman niya mosulod sa puwesto, iyang gisuspenso sulod sa 30 ka adlaw ang tanang quarry operations aron masusi ang mga kontrata ug compliance, nagpakita nga environmental protection usa na ka prayoridad sa iyang administrasyon sukad sa sinugdan.
Ubos sa Section 43 sa Republic Act 7942 o ang “Philippine Mining Act of 1995,” ang probinsyal nga gobyerno adunay katungod sa pag-isyu og quarry permits alang sa lugar nga dili molapas og lima ka ektarya. Kung molapas sa maong sukod, ang Department of Environment and Natural Resources (DENR) na ang mo-isyu sa permit.
Source: Cebu Province PIO
I via Renante Socia Lada