Libuan ka mga deboto ang mitambong sa tradisyonal nga Fluvial Procession karong adlawa, Enero 18, 2025, nga bahin sa pagsaulog sa kapistahan ni Señor Santo Niño ug Sinulog Festival.
Nagsugod kini pasado alas 4:00 sa buntag, ang rota Captain Veloso Port (Navforcen) ngadto sa Pier 1, Cebu City.
Sumala pa sa PCG-7 kapin sa 305 ka barko ang niapil sa maong Prosesyon.
Matod sa mga opisyal, ang fluvial procession magpakita sa pagpadayon sa debosyon ug pagsaulog sa kabilin ug tradisyon sa Sugboanon.
Sa maong kalihokan, pipila ka kadalanan ang sirado sugod alas 5:30 sa buntag aron masiguro ang kaluwasan.
Pagka alas 7:00 sa buntag mutuyok kini sa South Road Properties (SRP). Pagka alas 9:00 re-enactment didto sa Basilica Minore del Sto. Niño
Ang kapolisan ug mga otoridad nagpatuman og dugang seguridad alang sa hapsay ug malipayong pagsaulog. Ang publiko gina-awhag nga magtinabangay ug mag-amping sa tanang higayon. (Renante Socia Lada)