Nagpasalig si Cebu Governor Pamela Baricuatro nga iyang padayon nga pauswagon ang serbisyo sa panglawas sa probinsya. Matod niya, katungod sa tanang Cebuano ang makadawat og maayo ug barato nga pag-atiman sa ospital ug health center.
Gisulti niya kini atol sa usa ka tigom nga gitambongan sa mga opisyal sa panglawas sa Central Visayas. Ang tumong sa maong kalihokan mao ang pagpalig-on sa serbisyo sa panglawas ug mas mapadali ang paghatag og tabang sa mga residente.
Sumala sa gobernadora, nagkuha na ang Capitol og dugang nga mga doktor, nars, ug ubang health workers. Nagpaayo usab sila sa mga ospital ug nagpalit og bag-ong mga gamit aron mas maayo ang serbisyo sa mga pasyente. Gipahibalo usab ni Gov. Baricuatro nga padayon ang ilang pakigtambayayong sa DOH ug PhilHealth aron mas daghang Cebuano ang makabenepisyo sa libreng tambal ug uban pang serbisyo sa panglawas. Gitambongan ang maong tigom sa mga opisyal gikan sa Cebu ug Bohol.
I via Renante Socia Lada