Usa ka 25-anyos nga lalaki ang namatay human giingong giatake og bato sa usa ka insidente nga nahitabo sa Sitio Luray 1, Barangay Poblacion, Toledo City, Cebu, sa kadlawon sa Hulyo 4.
Ang biktima mao si Nikko Bacus Largo, samtang ang giingong naghimo sa krimen mao si Kent Mission Escoto, 30 anyos, nga residente usab sa maong lugar. Sumala sa kapulisan, ang suspek ubos sa impluwensya sa ilimnong sa dihang nahitabo ang insidente.
Sa inisyal nga imbestigasyon, naglakaw ang suspek aron mangita sa iyang amahan sa dihang iyang nasugatan ang biktima. Tungod sa iyang pagtuo nga adunay pusil kini, iya kining gi busdakan og bato nga naigo sa nawong ug dayon milayas.
Gidala pa sa mga responder ang biktima sa ospital apan gideklarar kini nga dead on arrival. Sa pag-inspeksyon sa mga otoridad, nasuta nga ang gidalang pusil sa biktima usa lamang ka replica o toy gun.
Human sa panghitabo, boluntaryong mitahan ang suspek ngadto sa Toledo City Police Station ug miangkon sa iyang nahimo. Gipriso na siya karon ug nag-atubang sa kasong homicide samtang nagpadayon ang imbestigasyon sa kapulisan.
I via Renante Socia Lada