Nasikop sa kapulisan ang usa ka lalaki nga giingong responsable sa pagpatay sa iyang kanhi partner sulod sa usa ka balay sa Barangay Dumlog, Toledo City. Ang suspek nadakpan pasado alas 7:00 sa buntag sa nakalabay nga adlaw.
Ang biktima, usa ka 32-anyos nga babaye nga giila sa alyas nga “Anne,” namatay tungod sa grabeng mga samad nga iyang naangkon atol sa giingong pag-atake. Ang suspetsado giila sa alyas nga “Cyril.”
Sa inisyal nga imbestigasyon, giingong miadto ang suspetsado sa balay diin nagpuyo ang biktima uban sa iyang inahan human sa ilang panagbulag. Misulod sa iyang kwarto ang biktima ug gi-lock ang pultahan, apan giingong nakaagi ang suspetsado sa luyo sa balay ug nakasulod sa sulod sa panimalay.
Didto, giingong giatake sa suspetsado ang biktima gamit ang gunting ug usa ka kahoy nga bara. Human sa hitabo, mikalagiw ang suspetsado ug nanghulga pa sa pamilya sa biktima.
Padayon pa ang imbestigasyon sa kapulisan aron matino ang tibuok panghitabo ug ang motibo sa krimen.
Gitan-aw usab kung ang pagkagumon sa ginadiling drogas mao bay nagtukmod sa suspetsado sa oagbuhat sa krimen.
I via Renante Socia Lada