Nagpagawas og pahimangno ang Cebu City Police Office (CCPO) nga padayon nilang gipalig-on ang seguridad sa tanang eskwelahan sa Cebu City aron masiguro ang kaluwasan sa mga estudyante, magtutudlo, kawani sa eskwelahan, ug mga ginikanan.
Sumala sa CCPO ubos sa pagpanguna ni Police Colonel Ricky C. Sumalde, gidugangan ang presensya sa kapulisan pinaagi sa mas daghang police patrol, inspeksyon sa seguridad sa mga eskwelahan, ug suod nga koordinasyon sa mga school administrators ug lokal nga kagamhanan.
Gihangyo usab sa CCPO ang tanang miyembro sa komunidad sa eskwelahan nga magmatngon ug dayong ireport sa mga otoridad o sa pinakaduol nga estasyon sa pulis ang bisan unsang kadudahang tawo, kalihokan, o hulga nga ilang namatikdan.
Gi-awhag usab ang publiko nga likayan ang pagpakaylap og wala pa mapamatud-ang impormasyon sa social media tungod kay mahimo kining hinungdan sa kahadlok ug kalibog sa katawhan.
Matud sa CCPO, ang kaluwasan sa mga eskwelahan responsibilidad sa tanan. Pinaagi sa panagtinabangay sa mga estudyante, ginikanan, magtutudlo, ug sa komunidad, masiguro ang malinawon ug luwas nga palibot alang sa pagkat-on sa matag estudyante.
I via Renante Socia Lada