Usa ka 24-anyos nga lalaki ang namatay human siya naanod sa kusog nga baha samtang nagtinguha untang motabang pagpugong sa usa ka taxi nga gibanlas sa tubig sa Barangay Paknaan, Mandaue City, niadtong miaging kagabii. Giila ang biktima nga si Jeremy Bolingket, residente sa Sitio Relocation Site, sa maong barangay.
Kauban ni Bolingket ang duha ka menor de edad, lakip ang usa nga gitawag og alias “Mac-Mac,” sa pagpaningkamot nga maluwas ang taxi nga nabanlas duol sa gymnasium sa Zone Ahos, Sitio Ibabao. Apan tungod sa grabe ka kusog nga agos sa tubig, silang tulo ang naanod. Swerte nga nakaluwas ang duha ka menor de edad samtang si Bolingket wala na makaluwas sa dagan sa baha.
Kagahapon sa buntag, nakaplagan ang patayng lawas ni Bolingket sa daplin sa Sitio Ganghaan, sulod gihapon sa barangay Paknaan. Ang insidente nagpamatuod sa peligro nga dala sa kusog nga baha nga makadaot dili lamang sa mga kabalayan apan lakip sa kinabuhi sa tawo.
Gawas sa maong insidente, tulo usab ka motorsiklo ug usa ka multicab ang nabanlas sa tubig, gawas pa sa daghang kabalayan nga nalunopan. Padayon karon ang assessment ug operasyon sa Mandaue City Disaster Risk Reduction and Management Office (MDRRMO) aron matabangan ang mga apektadong pamilya ug masiguro ang kaluwasan sa komunidad.
📸 CTTO
I via Renante Socia Lada