Naligo sa kaugalingong dugo ang usa ka lalaki nga kanhi piniriso sa kasong pagpatay human gipusil patay.
Didto kini nahitabo sa Sitio Tubod, Barangay Langkas, lungsod sa Dalaguete, Sugbo, pasado alas 10:30 kagahapon sa buntag, Hunyo 2, 2024.
Ang biktima giila sa Dalaguete Police Station nga mao si Brian Dela Peña, 39 anyos ang panuigon, residenti rapud sa maong lugar.
Sa imbestigasyon sa Dalaguete Police Station nasayran nga ang biktima luwan sa motorsiklo kauban sa laing lalaki sa dihang gibabagan og gipusil kini.
Naigo ang biktima sa iyang agtang og nawong sa duha ka mamumuno nga nagmotorsiklo usab atol sa pagbuhat sa maong krimin.
Ang mga suspetsado dali kining nisibat palayo sa maong lugar nga walay bisan usa nga nakaila.
Sa pagkakaron ang kapulisan padayon pa sa ilang imbestigasyon aron pagsuta sa motibo sa maong krimin ug si kinsa ang nibuhat niini. (Renante Socia Lada)