Nadakpan sa kapulisan sa Danao City ang usa ka wanted person nga nag-atubang og kaso nga tulis nga kapin 20 ka tuig nang pending. Nadakpan siya atol sa pagpatuman sa warrant of arrest sa Barangay Poblacion, Danao City, Cebu niadtong milabay nga adlaw.
Basi sa CPPO, ang pagdakop gihimo pinaagi sa warrant of arrest nga gi-isyu sa Municipal Trial Court in Cities sa Danao City. Gitugotan usab sa korte ang piyansa nga ₱10,000 alang sa temporaryong kagawasan sa akusado.
Human sa pagdakop, gipahibalo ang akusado sa kaso nga iyang giatubang ug sa iyang mga katungod subay sa Miranda Doctrine. Gibutang dayon siya sa kustodiya sa Danao City Police Station samtang gihulat ang iyang pagbalhin ngadto sa korte nga nag-isyu sa warrant.
Gidayeg ni PCOL Abubakar Udang Mangelen Jr., Provincial Director sa Cebu Police Provincial Office (CPPO), ang mga operatiba nga mipatuman sa maong operasyon. Matud niya, padayon ang ilang paningkamot sa pagdakop sa mga wanted person bisan pa og dugay na silang nagtago gikan sa hustisya.
Padayon usab ang CPPO sa ilang kampanya batok sa mga wanted person ug nag-awhag sa publiko nga motabang pinaagi sa paghatag og impormasyon nga makatabang sa pagdakop sa mga tawo nga adunay naglungtad nga warrant of arrest.
📸 CPPO
I via Renante Socia Lada