Gilunsad sa National Government ug City Government of Dipolog ang Local Government Support Fund–Financial Assistance to Local Government Units o LGSF-FALGU Rice Distribution Program niadtong Hulyo 24 sa D’Food Hub and Events Center sa Dipolog Boulevard.
Pinaagi sa programa, matag kwalipikadong panimalay sa Dakbayan sa Dipolog makadawat og 10 ka kilo nga bugas isip tabang sa pag-atubang sa adlaw-adlaw nga panginahanglan ug pagpalig-on sa food security sa komunidad.
Gipangunahan ang kalihokan sa Department of the Interior and Local Government Provincial Office, uban sa partisipasyon sa mga opisyal sa City Government of Dipolog, lakip si Vice Mayor Senen Angeles ug mga representante sa nagkalain-laing opisina sa dakbayan.
Sumala sa mga opisyal, ang maong programa kabahin sa padayon nga panagtinabangay sa nasyonal ug lokal nga panggamhanan aron maduol ang batakang serbisyo ug ayuda sa mga pamilyang nanginahanglan sa Dakbayan sa Dipolog.(JENIFFER JR. DELICA)
Source: Dipolog City Government