Nadakpan sa kapulisan ang usa ka lalaki nga giingong nagdala og armas human sa paspas nga pagresponde sa mga polis sa Police Station 5 sa Barangay Pahina Central, Cebu City, sa hapon sa Hulyo 23, 2026.
Ang operasyon gisugdan human makadawat og report gikan sa usa ka concerned citizen bahin sa usa ka armadong tawo. Ilalom sa pagdumala ni Police Captain Venstine Ponce Bontilao, dihadiha nga miresponde ang mga pulis aron susihon ang sumbong.
Sa operasyon, nadakpan ang suspetsado tungod sa paglapas sa Republic Act No. 10591 o ang Comprehensive Firearms and Ammunition Regulation Act. Nakuha gikan kaniya ang usa ka .22 caliber revolver nga adunay duha ka buok live nga bala.
Human sa pagdakop, gidala ang suspetsado sa Police Station 5 diin nagpabilin siya sa kustodiya samtang giandam ang kaso nga ipasaka batok kaniya sa korte.
Sumala sa Cebu City Police Office (CCPO), ubos sa pagpanguna ni Acting City Director PCOL Ricky C. Sumalde, magpadayon ang ilang lig-on nga kampanya batok sa ilegal nga pagpanag-iya og armas ug ang dali nga pagresponde sa mga reklamo sa katawhan aron masiguro ang kalinaw ug kaluwasan sa Cebu City.
📸 CCPO
I via Renante Socia Lada