Nadakpan sa kapulisan sa Balamban Municipal Police Station ubos sa Cebu Police Provincial Office (CPPO) ang usa ka lalaki nga nag-atubang og duha ka kaso sa sexual assault, alas 9:30 sa gabii, Agosto 16, 2025 sa Sitio Buhingtubig, Barangay Buanoy, Balamban, Cebu.
Ang suspetsado, 42-anyos ug usa ka welder, giila nga Top 7 Regional Level Most Wanted Person. Siya gisikop pinaagi sa Warrant of Arrest nga gipagawas sa Regional Trial Court Branch 8 sa Toledo City alang sa Criminal Case Nos. TCS-23189 ug TCS-23190. Ang mga kaso adunay kalabotan sa Section 5 (b) sa Republic Act 7610 o Special Protection of Children Against Abuse, Exploitation, and Discrimination Act. Base sa balaod, ang silot niini dili moubos sa 14 ka tuig ug 8 ka bulan ug mahimong molungtad hangtod sa reclusion perpetua (life imprisonment), gawas pa sa multa nga ipatong sa korte.
Karon, ang suspetsado anaa na sa kustodiya sa Balamban Police samtang naghulat sa pormal nga presentasyon ngadto sa korte nga nagpagawas sa mando sa pagdakop. Matod ni Police Brigadier General Redrico A. Maranan, Regional Director sa Police Regional Office 7, ang paspas nga aksyon sa kapulisan nagpamatuod sa seryoso nga kampanya batok sa tanang matang sa pag-abuso. Dugang pa niya, gi-awhag ang publiko nga magtinabangay ug dayon motaho sa kapulisan kung adunay susamang kaso aron maprotektahan ang kabatan-onan.
Source: PRO7 I via Renante Socia Lada