Nadakpan sa hot pursuit operation ang duha ka suspetsado nga tulisan nga nanulis og pasahero sa usa ka jeepney (PUJ) sa New Imus Road, Barangay Lorega San Miguel, pasado alas-11 sa buntag, Domingo, Agosto 17.
Ang mga suspetsado giila sa kapulisan nga mao sila si Vinz Niel Rayna Canucat alyas “Daot”, 23, taga Barangay Lorega, ug Arjohn Pobadora Boles, 18, taga Barangay Luz. Ang duha giingong nani-on og pusil ug gikulata pa ang biktima nga usa ka 21-anyos nga dalaga samtang nagbiyahe sa PUJ 03L (Mabolo–Carbon route). Human sa tulis, nikuha ang cellphone ug nidagan paingon sa interior sa Lorega.
Matod sa kapulisan, ang duha nailhan sa rogues gallery ug dali nga nadakpan. Apan sa imbestigasyon, mitumbok ang duha og laing tawo nga giila nga si Michael Villacarillo Villanueva, 33, residente sa Barangay Tejero, nga ilang giingong “mastermind” ug maoy midala sa nakawata nga iPhone 12.
Nakuha gikan sa usa sa nadakpan ang usa ka .357 Magnum revolver nga gigamit sa krimen, apan ang cellphone nga nakuha sa biktima tua gihapon sa gipangita nga si Villanueva.
Gitutokan karon sa mga operatiba sa Mabolo Police ang pagpangita ug pagdakop kang Villanueva samtang ang duha ka nadakpan temporaryong gibutang na sa prisohan.
Gipasabot sa kapulisan nga bisan pa sa pagpanghimakak sa duha ka suspetsado, klaro nga adunay ebidensya batok kanila ug mag-atubang sila sa kaso nga robbery with violence.
I via Renante Socia Lada