Imbis nga mutabang sa pagpawong sa sunog nakuryintihan na hinuon ang usa ka lalaki.
Ang sunog nga gi respondihan sa mga sakop sa kabomberohan sa Dakbayan sa Talisay didto kini sa Sitio Crossman, Barangay Bulacao, Siyudad sa Talisay, pasado alas 12:18 kagahapon sa hapon, Decembre 17, 2022.
Ang nakalas giila ni Senior Fire Officer 3 Guiller Pegarido, ang deputy chief sa Talisay City Fire Station nga mao si Jonard Requilme, 21 anyos ang panuigon,residenti sa maong lugar.
Sa imbestigasyon nasayran nga nisuway unta sa pag ilog sa hose sa bombero si Requilme apan aksidenti kining nasangit sa buhi nga kuryinti na maoy hinungdan sa iyang kamatayon.
Adunay 20 ka mga balay ang nasunog og ni danyos kini og P1.5 million.
Padayon ang imbestigasyon sa maong sunog aron pagtinoo sa hinungdan niini.
Nag awhag karon ang kabomberohan sa publiko nga kung adunay sunog ang mga bombero lang ang pa tubagon aron masiguro ang kaluwasan sa matag usa. (Renante Lada, photo credits to the owner)