Usa ka mangihaway og baboy ang namatay human madasmagi sa usa ka Elf truck samtang nilabang sa kalsada sa Barangay Poblacion Ward 2, Minglanilla, Cebu, pasado alas-11 sa gabii, Miyerkules, Oktubre 15, 2025.
Ang biktima giila nga si Delfin Labitad, 57-anyos, residente sa Purok Mahogany, Sitio Sambag, Barangay Tuyan, Naga City. Si Labitad, sumala sa imbestigasyon, nilabang sa National Highway sa dihang didto miagi ang Elf truck nga gimaneho ni Rico Baclayon Racho, 56-anyos, taga Barangay Lawis, Tawog, Carcar City.
Matod sa Traffic Enforcement Unit sa Minglanilla Police Station, kalit lang kuno og labang si Labitad nga wala magtan-aw sa maong direksyon, hinungdan nga naigo siya sa trak ug nahpak sa semento. Nakakab-ot siya og grabe nga samad ug bali sa kamot, nga maoy hinungdan sa iyang kamatayon.
Gisuwayan pa kini pagdala sa Minglanilla Rescue Team ngadto sa Minglanilla District Hospital, apan pag-abot, gideklarar siyang patay on arrival sa mga doktor.
Ang drayber nga si Racho karon gitanggong sa Minglanilla Police Station samtang nagpaabot sa desisyon sa pamilya sa biktima.
Samtang nagpahimangno ang kapolisan sa mga motorista ug pedestrian nga magmatngon sa dalan, labi na sa gabii, aron malikayan ang parehas nga disgrasya.
I via Renante Socia Lada