Padayon ang gihimong operasyon sa Police Regional Office 7 (PRO7) batok sa mga pinakapangita nga kriminal sa rehiyon, human madakpi ang duha ka Regional Most Wanted Persons sa managlahi nga operasyon sa Cebu ug Bohol.
Niadtong Oktubre 14, 2025, nadakpan sa usa ka hiniusang operasyon sa Barangay Balhaan, Badian, Cebu ang usa ka 41-anyos nga lalaki nga nailhan sa alyas “June,” Top 6 Most Wanted Person sa rehiyonal nga lebel. Ang operasyon gihimo sa himiusang pwersa sa 703rd Maneuver Company, RMFB7, Cebu Provincial Intelligence Unit, Regional Intelligence Unit 7, ug Badian Municipal Police Station. Si “June” gikasohan sa paglapas sa R.A. 10591 (Comprehensive Law on Firearms and Ammunition) ug Sections 5 ug 11, Article II sa R.A. 9165 (Comprehensive Dangerous Drugs Act of 2002) nga gisang-at sa RTC Branch 62, Oslob, Cebu.
Sa laing operasyon niadtong Oktubre 15, 2025, nadakpan usab sa mga personahe sa Candijay Municipal Police Station, Bohol Police Provincial Office ang usa ka lalaki nga nailhan sa alyas “Jhonny”, Top 10 Most Wanted Person sa rehiyon. Gidakop siya sa Purok 1, Barangay Guinacot, Guindulman, Bohol, pinaagi sa warrant of arrest alang sa paglapas sa Sections 5 ug 11 sa R.A. 9165 ubos sa Criminal Case Nos. 4943 ug 4944, nga gi-isyu ni Judge Judilyn Hugo Tapia Menchavez sa RTC Branch 8, Toledo City, Cebu, nga walay girekomendar nga piyansa.
Ang duha ka suspetsado karon anaa na sa kustodiya sa ilang tagsa-tagsa ka police stations samtang nagpaabot sa presentasyon sa korte. Ang ilang pagdakop gikonsiderar nga dako nga kalampusan sa kampanya batok sa kriminalidad sa rehiyon.
Si PBGEN Redrico A. Maranan, Regional Director sa PRO7, mipasidungog sa mga operatiba tungod sa ilang pagsakripisyo, kaisog, ug koordinasyon sa pagdakop sa mga pinakapinangita nga kriminal.
Padayon ang PRO7 sa pagpaningkamot nga mapalig-on ang balaod ug kalinaw sa Central Visayas, ubos sa mando sa Chief, Philippine National Police, aron matuman ang ilang tinguha nga “Serbisyong Mabilis, Tapat, at Nararamdaman” alang sa Bagong PNP sa Bagong Pilipinas.
Source: PRO7- PIO
I via Renante Socia Lada