Kapin 500 ka coconut farmers ug ilang pamilya ang mitambong sa gilusad nga Mobile Health Services sa Department of Agriculture–Philippine Coconut Authority (DA-PCA) diin gipasiugdahan sa Coconut Farmers and Industry Development Plan (CFIDP) sa Barangay Tinaplan, Sindangan Zamboanga del Norte.
Ang duha ka adlaw nga kalihokan nagsugod kaniadtong Oktubre 13-Oktubre 14 ug adunay temang “Bringing Healthcare Closer to the Coconut Farmers” nga naghatag libreng serbisyo medikal sama sa ultrasound, X-ray, Electrocardiogram (ECG), Complete Blood Count (CBC) ug Urinalysis. Lakip sa mga benipisyaryo nga nitambong ang barangay gikan sa Tinaplan, Bucana, Imelda, Titik, Dagohoy, Lagag ug uban pa.
Samtang si Regional Manager PCA Region IX Bihildis A. Quezon ug brgy. captain Hon. Danilo Dablo naghatag sa ilang mga mensahe sa pagbukas sa programa.
Gipaabot usab ni Governor Darel Dexter T. Uy, pinaagi ni Rosemarie Miranda, ang iyang suporta sa probinsyal nga pangagamhanan sa maayong panglawas ug agrikultura.
Matud pa sa Gobernador, pinaagi sa No Balance Billing Policy, ang mga kwalipikadong PhilHealth members nga ma-admit sa Zamboanga del Norte Mesical Center (ZNMC) makadawat ug full coverage sa hospital bills ug medical services, usa ka dakong lakang sa pagpatuman sa Universal Health Care.
Ang kalihukan gipahigayon pinaagi sa panaghiusa sa PCA Region IX, Provincial Government sa Zamboanga del Norte, ug LGU Sindangan aron mapaduol ang libre ug epektibong serbisyo medikal sa mga mag-uuma.(IKEN B. GULLEM)
Source: Zamboanga del Norte Provincial News Network