Usa ka lalaki ang napalgang patay sa usa ka tulay sa Purok 7, Barangay Dap-dap, Compostela, Cebu alas 2:00 sa kaadlawon, Pebrero 1, 2025.
Ang biktima giila sa kapulisan nga si Rodel Bejoc Solamo, minyo (apan nagbulag na), ug residente sa Barangay Cantumog, Carmen, Cebu. Samtang ang suspek, nga responsable sa iyang pagpatay, wala pa mailhi sa kapulisan.
Matod sa taho nga nadawat sa Compostela Police Station, usa ka barangay tanod nga si Honesto Dagatan ang misumbong nga adunay pagpangtigbas nga nahitabo sa maong dapit. Sa pagresponde sa mga awtoridad, ilang nadiskubre ang biktima nga nagbuy-od na sa daplin sa tulay, nga wala nay kinabuhi.
Sa inisyal nga imbestigasyon, nahibaw-an nga ang biktima nag-inom sa usa ka tindahan duol sa maong lugar. Human sa pag inum, nibiya siya kauban ang usa ka babaye nga nailhan nga si Jesil.
Pagkahuman sa paghatod sa babaye, mibalik siya ug naglakaw paingon sa tulay. Didto, sa ngitngit nga bahin sa dalan, kalit siyang giatake sa wala pa mailhing suspek ug gitigbas.
Ang biktima nakadawat og samad sa liog nga maoy hinungdan sa iyang kamatayon. Karon, ang kapulisan padayon nga naghimo og imbestigasyon ug nagapangita sa babaye nga kauban sa biktima aron matabangan sa pagtino sa posibleng responsable sa krimen.
Padayon ang hot pursuit operation sa Compostela Police aron madakpan ang suspek ug mahatagan hustisya ang kamatayon sa biktima. (Renante Socia Lada)