Tulo ka tawo ang nadakpan ug gibanabana nga P142,800 nga kantidad sa gituohang shabu ang nakumpiska sa usa ka buy-bust operation nga gihimo sa Sitio Balagon, Barangay Labangon, Cebu City niadtong Enero 30, 2025, alas 2:05 sa hapon.
Ang operasyon gipangulohan sa mga operatiba sa PDEA-7 kauban ang Cebu City Police Office Station 10, nga misangpot sa pagpuhag sa usa ka drug den.
Ang target sa operasyon mao si alias Emerson, 41-anyos, walay trabaho, ug residente sa maong lugar.
Siya ang gitumbok nga tagdumala sa drug den.
Kauban niyang nadakpan ang duha ka bisita sa drug den nga sila si alias Eugene, 53-anyos, usa ka junkshop worker, ug alias Baltazar, 41-anyos, usa ka tricycle driver. Ang duha kay mga residente usab sa Barangay Labangon.
Sa operasyon, nakuhà ang 16 ka pakete sa shabu nga may gibug-aton nga 21 gramos ug nagkantidad og P142,800, buy-bust money, ug nagkalain-laing drug paraphernalia. Ang nakumpiskang ebidensiya gipadala na sa PDEA-7 Regional Office Laboratory alang sa saktong pagproseso.
Ang tulo ka nadakpan mag-atubang og kaso ubos sa Sections 5, 6, 7, 11, ug 12, Article II sa RA 9165, o ang Comprehensive Dangerous Drugs Act of 2002.
Nagpabilin ang PDEA ug kapulisan nga mabinantayon batok sa mga drug den tungod kay kini usa ka hinungdan sa kasamok, krimen, ug kagubot sa komunidad. (Renante Socia Lada)
(Source: PDEA-7)