Patay dayon ang usa ka 59-anyos nga lalaki human gipusil sa tulo ka wala pa mailhing mga suspek sa Barangay Limocon Ilaud, lungsod sa Dimiao, Bohol alas 9:50 sa buntag niadtong Martes, Abril 21, 2026.
Ang biktima nailhang nga si Romeo Boyles, walay trabaho, ug namatay sa mismong lugar sa insidente tungod sa grabeng samad sa pagpamusil.
Sumala sa inisyal nga imbestigasyon sa Dimiao Police Station, samtang ang biktima nagbugha og kahoy sa dihang kalit lang mitungha ang tulo ka lalaki nga nagsakay og motorsiklo. Usa sa mga suspek ang miduol ug mipusil kang Boyles, samtang ang duha ka kauban niini nagbantay sa palibot.
Gikatahong misulay pa og depensa ang biktima ug giilog ang armas sa gunman, apan napakyas. Midagan pa si Boyles aron makalikay, apan gigukod siya sa suspek ug gitiwasan og pusil, hinungdan sa iyang kamatayon.
Padayon ang imbestigasyon sa kapulisan aron mailhan ang mga responsable ug masuta ang tinuod nga motibo sa krimen. Naghangyo usab ang mga otoridad sa publiko nga makigtambayayong ug maghatag og impormasyon nga makatabang sa pagdakop sa mga suspek.
Source: Dimiao MPS
I via Renante Socia Lada