Patay ang usa ka 12-anyos nga batang lalaki human malumos samtang naligo sa suba sa Villa Reyna Subdivision, Barangay Yati, Liloan, Cebu, pasado alas 1:00 sa hapon niadtong Abril 21.
Ang biktima nailhan nga si John Laurence Endriga, residente sa Kawayan 3, Barangay Tayud sa maong lungsod.
Base sa imbestigasyon sa Liloan Police Station, ang bata nanghagad sa tulo niya ka mga amigo, nga pulos menor de edad usab, nga mobalik sa suba diin sila una nang naligo.
Mikuyog ang iyang mga kauban ug namalik sila sa lugar.
Pag-abot didto, gipahimangnoan pa sila sa caretaker nga delikado ang paglangoy tungod sa kusog nga sulog sa tubig.
Bisan pa niini, kalit lang miambak ang biktima ug gidala sa kusog nga sulog hinungdan nga nalumos kini.
Gipaninguhaan pa sa iyang mga kauban nga maluwas siya, apan wala na kini matabangi ug namatay sa insidente.
Padayon karon ang pahimangno sa kapulisan ngadto sa ginikanan ug kabatan-onan nga magbantay ug likayan ang paglangoy sa mga lugar nga adunay kusog nga sulog aron malikayan ang susamang trahedya.
Source: Liloan MPS
I via Renante Socia Lada