Padayon karon ang pag-ayo ug konstruksyon sa walo ka tulay sa amihanang bahin sa Cebu nga nadaot tungod sa 6.9 magnitude nga linog niadtong Septiyembre sa miaging tuig.
Ang maong mga tulay kabahin sa ₱276 milyon nga budget alang sa rehabilitasyon sa mga imprastraktura nga gi-aprubahan ni Gobernadora Pamela Baricuatro aron matabangan ang mga lungsod nga grabeng naapektuhan sa linog.
Sa lungsod sa Borbon, gilain ang ₱60.037 milyon para sa tulo ka tulay, lakip na ang Cabica Bridge, Cadaruhan Bridge, ug Tagnucan Bridge.
Samtang nagsugod na usab ang pag-ayo sa uban pang tulay sama sa Poblacion-Suba Bridge sa Daanbantayan nga nagkantidad og ₱33.344 milyon, Guadalupe Bridge sa dakbayan sa Bogo nga nagkantidad og ₱20.006 milyon, Tabunok Bridge sa Sogod (₱18.011 milyon), Piyo Bridge sa Tabogon (₱16.886 milyon), ug Lamintak Bridge sa Medellin (₱11.448 milyon).
Ang walo ka tulay kabahin sa 16 ka unang proyekto nga gitutokan sa probinsya alang sa rehabilitasyon sa mga nadaot nga imprastraktura human sa linog.
Sumala sa kapitolyo, padayon ang ilang paningkamot aron mapaspasan ang pag-ayo sa mga tulay ug masiguro ang kaluwasan sa mga molabay nga motorista ug residente sa maong mga lugar.
Source: Cebu Province PIO
I via Renante Socia Lada