Patay ang usa ka 45-anyos nga lalaki human kini gipusil sa wala pa mailhing mga suspetsado sa Sitio Santo Niño Sabellano Street, Poblacion Pardo, Cebu City, kagahapon sa hapon, Marso 18, 2025.
Giila ang biktima nga si Rudgie Dela Peña, 45-anyos, residente sa Barangay Tungkop, Lungsod sa Minglanilla, Sugbo.
Matod sa inisyal nga imbestigasyon, naglakaw ang biktima sa maong dapit dihang kalit siyang giduol sa duha ka mga lalaki nga may armas ug gipusil makadaghang higayon. Human sa pagpamusil, misibat ang mga suspek padulong sa wala pa matumbok nga direksyon.
Ang mga residente ug saksi misuway sa pagtabang sa biktima, apan napatay kini diha-diha dayon tungod sa grabeng mga samad nga naangkon.
Dugang imbestigasyon sa Cebu City Police Office, nasayran nga kanhi piniriso si Dela Peña tungod sa kalambigitan sa ilegal nga armas ug matod usab nalambigit kini sa ilegal nga drugas.
Sa pagkakaron padayon ang imbestigasyon sa kapulisan aron matino ang motibo sa krimin ug si kinsa ang mga resposabli niini.
I via Renante Socia Lada