Usa ka 22-ka-adlaw nga bata ang malampusong naluwas sa mga awtoridad human masuta nga gibaligya siya sa iyang kaugalingong inahan alang sa P30,000 aron makapalit og bag-ong cellphone.
Matod ni Catalina Abella, focal person sa Gender and Development (GAD) sa Cebu City Social Welfare and Services (CSWS), nasayran ang maong insidente human makadungog ang usa ka silingan sa panulti sa mga bata nga ilang manghod gibaligya.
Ang maong impormasyon gipost sa social media sa usa ka nagpakabanang lungsoranon, hinungdan nga gilusad ang imbestigasyon niadtong Marso 7, 2025.
Kauban ang Mambaling Police Station 11, giduaw sa mga awtoridad ang balay sa inahan sa Barangay Duljo Fatima. Didto, mitug-an ang inahan ug mibutyag nga gihatod na ang bata ngadto sa usa ka middleman o recruiter.
Nailhan sa mga awtoridad ang middleman nga silingan mismo sa inahan, ug ilang dayon kining gitumbok. Sa sinugdanan, nagdumili ang middleman sa akusasyon, apan ang iyang anak misulti sa tinuod nga panghitabo.
Dili lang kini ang unang higayon nga gibaligya sa inahan ang iyang anak. Nasayran nga kini ang ika-walong anak sa inahan, ug kaniadto, gibaligya usab niya ang ika-pitong anak.
Sa iyang depensa, miingon ang inahan nga gibuhat niya kini tungod sa kalisod. Apan napamatud-an sa mga awtoridad nga siya usab nalambigit sa paggamit og ilegal nga drogad.
Sa kasamtangan, ang inahan ug ang iyang live-in partner, nga amahan sa bata, anaa na sa Cebu City Jail. Samtang, ang pito ka mga bata, lakip ang naluwas nga masuso, gikuha na sa Department of Social Welfare and Development (DSWD) alang sa ilang kaluwasan.
Nagpadayon ang imbestigasyon sa kaso, ug posibleng mag atubang ang mga nadakpan sa kasong human trafficking.
I via Renante Socia Lada