Gidakop sa kapulisan ang usa ka lalaki human kini gipasanginlan nga nanghulga sa laing tawo samtang armado og pusil sa Barangay Luz, Cebu City niadtong gabii sa Hunyo 14, 2026.
Sumala sa Cebu City Police Office (CCPO), nakadawat og report ang mga sakop sa City Drug Enforcement Unit (CDEU) ug Mabolo Police Station 4 mahitungod sa usa ka armadong tawo nga naggubot sa maong lugar. Dali silang miresponde aron susihon ang insidente.
Ang biktima, nga residente usab sa Barangay Luz, misumbong sa kapulisan nga gihulga siya sa suspetsado gamit ang armas. Human sa ilang pag-abot sa lugar ug pagpahigayon sa hustong police intervention, ilang nadakpan ang suspek.
Nasakmit gikan sa suspetsado ang usa ka .40 caliber pistol nga adunay upat ka buok buhing bala ug usa ka improvised holster. Giingon sa kapulisan nga wala kini’y legal nga dokumento alang sa pagpanag-iya sa maong armas.
Gidala ang suspetsado ug ang mga ebidensya ngadto sa Mabolo Police Station 4 alang sa hustong disposisyon. Nag-atubang kini karon og kasong Grave Threats ug paglapas sa Republic Act 10591 o ang Comprehensive Firearms and Ammunition Regulation Act.
Matud sa CCPO, ang ilang paspas nga pagresponde nakatabang sa pagpugong sa posibleng mas seryosong insidente ug sa pagmintinar sa kalinaw ug kahapsay sa komunidad.
I via Renante Socia Lada