Patay ang usa ka 52-anyos nga lalaki human malabuki sa tari sa manok sa Barangay Lanas, Siyudad sa Naga, Sugbo, nahitabo kini niadtong Sabado sa hapon, Abril 26, 2025.
Ang biktima giila nga si Antonio Cañada Restauro, taga-Purok Center, Barangay Tagjaguimit sa maong dakbayan.
Sumala sa report sa City of Naga Police Station, nahitabo ang insidente alas 2:00 sa hapon ug nadawat ang impormasyon sa kapulisan alas 7:00 sa gabii sa susamang adlaw.
Sa imbestigasyon sa kapulisan ug pamahayag sa igsoon sa biktima nga si Mario Restauro, 43 anyos, nasayran nga si Antonio naglimpyo kuno sa tari sa iyang manok apan nahulog ang tari ug nasamad ang iyang wala nga tiil. Daling gidala ang biktima sa tambalanan apan patay na kini pag-abot.
Apan sa bag-ong update, giangkon sa pamilya nga dili tinuod nga naglimpyo sa tari ang biktima. Matod nila, gilabkan kini sa manok samtang nagkuyme siya sa usa ka tarian sa Barangay Lanas.
Nagpadayon pa ang imbestigasyon sa kapulisan aron masuta ang tinuod nga hinungdan sa trahedya.
I via Renante Socia Lada