Kapin sa P8.2 milyones nga kantidad sa gituhuang shabu ang nasakmit sulod sa 24 ka oras human sa sunod-sunod nga mga coordinated drug operations nga gipasiugdahan sa Police Regional Office 7 (PRO7) sa tibuok Cebu, nga naghatag og dakong kadaut sa mga illegal drug network sa Central Visayas.
Ang labing dagkong nakumpiskar natala sa Cebu City, diin duha ka lahi nga buy-bust operations nakakuha og kinatibuk-ang 900 gramos sa shabu nga nagkantidad og P6.1 milyon.
Ang unang dako nga operasyon nahitabo niadtong Abril 25, 2025, sa alas 8:35 sa gabii sa Figueroa Street, Barangay Sawang Calero, Cebu City, diin usa ka 22-anyos nga high-value target ang nadakpan. Ang mga operatiba sa Police Station 6 sa CCPO nakakumpiskar og 500.5 gramos sa gituhuang shabu nga nag kantidad og P3,403,400.
Dili pa madugay, alas 10:50 sa gabii, sa Sitio Sinulog, Barangay Mabolo, Cebu City, usa ka joint operation sa City Drug Enforcement Unit sa CCPO ug PDEA-7 nakakumpiskar og 400 gramos sa giingong shabu nga nagkantidad og P2,720,000, lakip na ang P250 nga kuwarta ug drug paraphernalia.
Sa laing operasyon didto sa Barangay Tayud, Consolacion, mga operatiba sa Cebu Police Provincial Office ug Consolacion Municipal Police Station midakop usab sa laing high-value individual ug nakasakmit og 100 gramos sa shabu nga gibanabana og kantidad nga P680,000.
Ang tanang nadakpan mag atubang sa kaso ubos sa Sections 5 ug 11 sa Republic Act 9165 o Comprehensive Dangerous Drugs Act of 2002.
Mipasalig ang PRO7 nga magpadayon sa ilang aktibo ug lig-on nga mga operasyon aron hingpit nga gub-on ang mga drug network sa rehiyon.
Source: PRO7- PIO
I via Renante Socia Lada
#rpndykccebu
#675hzamband