Nakit-an pag-usab ang usa ka sinkhole sa Purok Kalubihan, Barangay Maslog, Tabogon, niadtong Oktubre 17, 2025, nga nakapahadlok sa mga residente sa maong lugar. Dali nga miresponde ang Municipal Disaster Risk Reduction and Management Office (MDRRMO) Tabogon uban ang Bureau of Fire Protection (BFP) Tabogon aron tan-awon ug i-assess ang kahimtang sa yuta ug ang risgo niini sa mga lumulopyo.
Sumala sa inisyal nga assessment, gisusi sa mga awtoridad ang giladmon ug gilapdon sa lungag aron masuta kung adunay posibilidad nga mosaka pa o modako ang pagkaguba sa yuta. Gisiguro usab sa MDRRMO nga gipahimutang na ang mga babag ug pahimangno aron malikayan ang pagduol sa mga tawo sa peligro nga lugar.
Gihangyo sa LGU Tabogon ang publiko nga likayan ang maong dapit ug dayon nga ipahibalo sa mga otoridad kon makakita og susamang lungag, paglapad sa yuta, o abnormal nga kalihokan sa palibot aron mapugngan ang kadaut ug disgrasya.
Padayon karon ang LGU ug MDRRMO Tabogon sa pagbantay ug pagmonitor sa kahimtang, samtang nagpadayon usab ang ilang mga lakang aron masiguro ang kaluwasan ug kasiguroan sa tanang residente sa lungsod.
📸 Contributed
I via Renante Socia Lada