Hingpit nang nadakpan sa kapulisan si Humprey Elvira, ang administrator sa Facebook page nga “Kugtong sa Opon,” human gi-implementar ang warrant of arrest tungod sa 15 ka counts sa kasong Cyber Libel nga gisang-at ni Lapu-Lapu City Congressman Junard Chan.
Nasikop si Elvira sa Purok 1, Barangay Cangmating, Sibulan, Negros Oriental pasado alas 2:00 sa hapon niadtong Hunyo 20, 2026, pinaagi sa joint operation sa Criminal Investigation Unit (CIU), Lapu-Lapu City Police Office (LCPO), Police Station 5, PRO 7, Sibulan MPS, NOPPO, ug PRO NIR.
Ang warrant of arrest gi-isyu sa RTC Branch 27 sa Lapu-Lapu City niadtong Hunyo 11, 2026, nga adunay girekomendar nga pyansa nga ₱48,000 kada count, o total nga ₱720,000 alang sa temporaryong kagawasan.
Si Elvira nailhan isip usa sa mga unang vocal nga kritiko sa pipila ka politiko sa Lapu-Lapu City, pinaagi sa iyang Facebook page nga “Kugtong sa Opon,” diin kanunay niyang gibatikos ang mga isyu sa gobyerno sama sa giingong ghost projects ug uban pang alegasyon sa lokal nga pamunuan.
Matod sa reklamo, ang kaso naggikan sa mga Facebook posts nga may kalabotan sa maong mga isyu.
Sa karon, si Elvira anaa na sa kustodiya sa LCPO Custodial Facility samtang nagpadayon ang legal nga proseso sa iyang kaso.
I via Renante Socia Lada