Sa unang tulo ka semana sa pagdumala ni Acting PNP Chief PLTGEN Jose Melencio Nartatez Jr., nabati dayon sa Central Visayas ang mas malinawon nga komunidad ug mas luwas nga mga dalan.
Base sa datos sa Police Regional Office (PRO-7), miubos og 34.90 porsyento ang natala nga krimen sa rehiyon kumpara sa sama nga yugto niadtong 2024. Gikan sa 149 ka kaso, 97 na lang ang narehistro tali sa Agosto 25 hangtod Setyembre 13, 2025. Kini resulta sa Enhanced Managing Police Operations (EMPO), nga mao ang unang prioridad sa 7-Point Agenda ni Nartatez.
Si PRO-7 Director PBGEN Redrico A. Maranan misulti nga padayon ang kalamboan sa peace and order tungod sa agresibong kampanya kontra iligal nga drogas, iligal nga armas, ug terorismo. Sukad katapusan sa Agosto, 550 ka drug suspects ang nadakpan, lakip ang upat ka high-value targets. Gikumpiskar usab ang kapin ₱11.6 milyon nga kantidad sa shabu ug marijuana.
Gawas niini, 355 ka wanted persons ang nasikop, diin 69 niini giisip nga most wanted sa rehiyon. Sa operasyon batok iligal nga armas, 66 ka suspek ang nadakpan samtang 102 ka armas ug usa ka eksplosibo ang nakumpiskar. Dugang pa, 104 ka pusil ang gipaubos nga gisurender sa Revitalized Katok Operations. Tungod niini, mikunhod usab ang shooting incidents ngadto sa duha na lang sa ikaduhang semana sa Setyembre.
Lakip sa 7-Point Agenda ni Nartatez ang pagpangusog sa seguridad sa vital installations ug areas of concern, pagpanguna sa maayong pagdumala sa mga kapulisan, ug paghatag importansya sa morale ug kaayuhan sa mga miyembro sa PNP.
Sumala ni PBGEN Maranan, mas mosamot pa ang pagbati sa kalinaw ug kahapsay sa rehiyon pinaagi sa malinawon, epektibo, ug may kasing-kasing nga pagdumala ni PLTGEN Nartatez.
Source: PRO7- PIO
I via Renante Socia Lada