Usa ka 16-anyos nga sakristan ang napalgang patay human kini na-missing sulod sa duha ka adlaw human molukso sa Bugasok Falls sa Barangay Cunalom, Argao niadtong Sabado, Septiyembre 13, 2025.
Giila sa Argao Police ang biktima nga si Russel Morsillos, Grade 11 student sa Argao National High School ug altar server sa Archdiocesan Shrine of Saint Michael Archangel sa Poblacion, Argao, Sugbo.
Base sa imbestigasyon, kuyog ni Russel ang iyang mga higala nga nangaligo sa maong busay. Apan sa dihang nihaw-as na ang uban pasado alas-4 sa hapon, siya na hinoon ang molukso aron maligo ug wala na kini mubalik. Dali kini gireport sa barangay ug sa kapulisan.
Gipangita dayon siya sa mga sakop sa Argao Disaster Risk Reduction and Management Office (DRRMO), apan tungod sa kusog nga agas ug kalubog sa tubig wala dayon siya makita.
Kagahapon Lunes, Septiyembre 15, pasado alas-11 sa buntag, napalgan na ang iyang lawas nga nasangit sa sanga sa kahoy sa daplin sa sapa sa Barangay Usmad. Daghan ang nagsubo sa pagkawala ni Russel nga nailhan isip buotan ug relihiyosong batan-on.
I via Renante Socia Lada