Usa ka kasikas ang nakapukaw sa kapulisan sa Abellana Police Station 2 niadtong Martes sa gabii, Hunyo 3, human maalarma ang mga kaubanang Koreano sa pagkahawa og kalit sa ilang kauban atol sa ilang tagay sa usa ka bar sa Mango Avenue.
Nasayod ang kapulisan sa maong insidente human midangop ang duha ka Koreano sa presinto, nagtuo silang gi-kidnap ang ilang amigo. Misamot ang tensyon kay giapil na sa imbestigasyon ang Korean Embassy, human madawat ang mensahe nga nangayo og ₱4,500, nga gituohang ransom.
Apan, nasuta nga ang gituhuang biktima nakig uban diay og mahuyang sa motel.
Sa imbestigasyon, nasayran nga human sa tagay, nakaila ang Koreano og usa ka ‘maanyag’ nga nilalang sulod sa bar. Nagka sinabtanay sila nga magpadayon sa ilang bonding sa usa ka motel duol sa Calamba.
Wala nakahibalo ang maong Koreano nga dili diay tinuod nga babaye ang iyang kauban, ug sa ilang intimate moment, nakurat siya sa nadiskobrehan. Apan human sa kakurat, mipadayon ra gihapon sila sa ilang “panagtagay sa lawas.”
Matod pa sa maong Koreano, tungod sa kahubog ug kahayag sa suga sa bar, wala na niya mabantayi ang tanan.
Nasulbad ra ang tanan, ug nakaginhawa og dako ang kapulisan ug ang embahada sa Korea human masayran nga walay tinud-anay nga krimen nahitabo. Usa ra kini ka pahinumdom sa tanan nga ang kahubog makadala og kasinatian nga dili nimo damhon.
I via Renante Socia Lada