Usa ka dakong kalampusan batok sa kriminalidad ang nakab-ot sa Tagbilaran City Police Station ubos sa pagpangulo ni PLTCOL John Kareen O. Escober human madakpan ang duha ka pinaka-most wanted nga personalidad sa duha ka bulag nga operasyon sa samang adlaw. Kini nagpamatuod sa kalampusan sa Oplan LIMPYO Tagbilaran ug sa estratehikong direksyon sa Peace and Order Formula ni PBGEN Redrico A. Maranan.
Sa mga alas 10:35 sa buntag, ang Tracker Team sa Tagbilaran City Police, uban sa tabang sa BOHOL MARPSTA, mipahigayon og operasyon nga misangpot sa pagdakop sa No. 1 Provincial Level Most Wanted Person didto sa Promenade Area, Brgy. Poblacion 2, pinaagi sa mando sa korte alang sa kaso nga paglapas sa Republic Act 9287 (Illegal Numbers Game).
Paglabay lang sa kapin usa ka oras, mga alas 12:00 sa udto, gihimo na usab sa parehong Tracker Team ang laing operasyon, karon uban sa BOHOL CIDG PFU, RIU 7 BOHOL PIT, BOHOL MARPSTA, ug 702nd MC-RMFB 7, nga midakop sa No. 8 Regional Level Most Wanted Person sa Brgy. Manga, nga atubang sa duha ka kaso sa Aggravated Rape by Sexual Assault.
Ang duha ka high-value nga suspek karon gitipigan na sa custodial facility sa Tagbilaran City Police Station.
Ang maong mga pagdakop nagpamatuod sa kusog ug determinasyon sa kapulisan sa pagpatuman sa Oplan LIMPYO Tagbilaran, usa ka lawom nga inisyatiba alang sa kalinaw ug kahapsay nga naglangkob sa pagpatuman sa balaod, kampanya batok ilegal nga drogas, panaghiusa sa komunidad, ug pagpangandam sulod sa organisasyon.
Gipasalamatan ni PLTCOL Escober ang suporta sa lokal nga panggamhanan sa Tagbilaran ug ang aktibong partisipasyon sa komunidad.
Source: Tagbilaran City Police Station
I via Renante Socia Lada