Sa lig-on ug dali nga aksyon, duha ka pulis gikan sa Police Regional Office 7 (PRO7) ang mipakita sa ilang kaisog ug kadasig sa serbisyo human nila marekober ang mga gikawat nga gamit sa usa ka pasahero sa wala pa moagi ang pipila ka minuto.
Ang insidente nahitabo niadtong nakalabay na gabii, atubangan sa Cebu City Medical Center (CCMC), diin usa ka pasahero ang nabiktima sa pagpanikas samtang nisakay sa bus. Nakuha sa kawatan ang iyang cellphone ug ATM card.
Apan, sa paspas nga koordinasyon ug reaksyon sa mga sakop sa kapulisan, naresolbar dayon ang maong insidente. Si Police Master Sergeant (PMSG) Ranulfo Villaver Jr. sa Mambaling Police Station, nga dayon misugod sa aksyon, maoy nakarekober sa mga gamit. Ang paspas nga alerto gikan kang Police Chief Master Sergeant (PCMS) Herbert Pananganan sa San Fernando Police Station, nga nahimutang usab sa maong bus, maoy nakatabang pag-ayo sa dali nga pagresponde.
Gipakita sa mga pulis ang ilang pagka-alerto ug dedikasyon sa ilang katungdanan, nga gipasalamatan gayud sa biktima pinaagi sa usa ka Facebook post. Gisugyot niya nga ang maong kasinatian nagpamatuod nga luwas pa gihapon ang dakbayan sa Sugbo para sa mga residente ug pasahero.
Gidayeg usab ni PBGen Redrico A. Maranan, Regional Director sa PRO7, ang maong kabayanihan sa duha ka sakop sa kapulisan.
Ang maong insidente nagpakita nga ang kaluwasan sa Cebu City usa ka buhing saad nga gituman sa maayong serbisyo, pagbantay, ug pagtinabangay sa katawhan ug kapulisan.
Sa padayon nga kooperasyon sa publiko ug kusog nga presensya sa PRO7, nagpabilin nga luwas ug angay puy-an ang Cebu City, usa sa mga labing angay nga lokasyon para sa pagpuyo ug negosyu-an sa tibuok nasud.
Source: PRO7
I via Renante Socia Lada
#rpndykccebu