Nadakpan sa mga operatiba sa National Bureau of Investigation (NBI)-Central Visayas ang 17 ka Taiwanese nationals, lakip ang unom nga giila nga wanted ug gituohang sakop sa “Four Seas Gang,” usa ka iladong sindikato sa Taiwan.
Gipahigayon ang operasyon niadtong Mayo 15, 2025 sulod sa usa ka subdivision sa siyudad sa Sugbo, human masubay sa NBI ang usa sa mga suspek nga adunay outstanding warrant of arrest ug nag-book og biyahe gikan sa Manila paingon sa Cebu.
Sumala sa imbestigasyon, ang grupo gituohang nalambigit sa romance scam nga naggamit og mga scripted messages aron makapangilad og mga biktima sa ubang nasud.
Gikumpiska sa mga otoridad ang 17 ka CPU units, 23 ka cellphone, ug duha ka crypto wallets nga posible gigamit sa ilang ilegal nga operasyon.
Sa pagkakaron, temporaryong gitanggong ang mga dinakpan sa NBI Central Visayas Regional Office samtang nagpadayon ang imbestigasyon ug koordinasyon sa foreign authorities alang sa posibleng deportation sa mga suspetsado.
Magpabilin ang pagbantay sa NBI batok sa mga langyaw nga nagagamit sa Pilipinas isip basehan sa ilang mga krimen nga target ang mga langyaw nga biktima.
Source: NBI-7
I via Renante Socia Lada