Patay ang usa ka giingong notadong kawatan human kini mahulog gikan sa atop sa storage room sa Don Andres Soriano National High School sa Sitio Landing, Barangay DAS (Lutopan), Toledo City, kagahapon sa buntag, Martes, Agosto 26, 2025.
Ang biktima giila sa kapulisan nga si Leopoldo Olayvar, hingkod ang edad ug residente sa Purok Daspo sa maong barangay.
Nakit-an ang lawas sa maestro nga si Dennis Patalinghug pasado alas-8 sa buntag nga nagkadugo ang ulo sa biktima. Dayon kining nitaho sa Toledo City Police Station.
Base sa imbestigasyon, posible nga gikan sa atop misulod si Olayvar aron mangawat, apan nahulog kini ug naigo ang ulo hinungdan sa iyang kamatayon. Nakit-an usab nga nagbitay pa ang sapot niini sa dapit sa atop sa storage room.
Matod pa sa kapulisan, si Olayvar usa ka notadong kawatan nga naglihok sa maong dapit ug posibleng wala na kini nakalingkawas sa iyang plano nga pagpangawat.
I via Renante Socia Lada