Nadakpan sa kapulisan sa San Fernando ang usa ka kanhi gwardya, sa nakalabay na adlaw, nga giingong responsable sa pagpusil patay sa chief internal security officer sa Azora Holdings Inc. niadtong Enero 23, 2025.
Ang dinakpan giila nga si Alberto Pasion Monsanto, 34 anyos, nga nailhan usab sa alyas Alfredo Monsanto. Siya maoy kanhi head guard sa Hebrews Security Agency nga nagserbisyo sa nasangpit nga petroleum company nga gipanag-iya ni Vincent Co, uyab sa sikat nga aktres nga si Bea Alonzo.
Base sa imbestigasyon, nasuko si Monsanto ug duha pa ka kauban niini human gitangtang sila sa serbisyo ni Armando Cañedo, ang biktima nga chief security officer sa kompanya. Sa adlaw sa krimen, giatangan nila ang biktima samtang kini pauli sa balay ug gipusil hangtod namatay. Human sa pagpamusil, misibat dayon ang mga suspetsado sakay sa motorsiklo.
Apil sa gipasakaan mao si Carlito Tayong Jr., security supervisor, ug usa pa nga wala pa mailhi nga giila lang isip John Doe. Silang tulo gipasakaan ug kasong murder.
Human sa pipila ka bulan sa pagtago, mibalik si Monsanto sa Pitalo, San Fernando aron magtrabaho pag-usab isip gwardya. Apan pinaagi sa tracker team nga gipangulohan ni Police Major Michael Gingoyon, nasikop kini Agosto 25 base sa warrant of arrest nga giisyu ni Judge Joy Bracero Redoble sa RTC Branch 77 sa Carcar City.
Sanglit murder ang kaso, dili tugotan og pyansa si Monsanto ug dad-on kini sa Cebu Provincial Detention and Rehabilitation Center (CPDRC) sa Kalunasan, Cebu City.
I via Renante Socia Lada