Nahimo’ng trahedya ang usa ka solar street light project sa PC Hills, Barangay Lahug, Cebu City human duha ka construction workers ang namatay ug upat ang naangol.
Sa imbestigasyon sa Cebu City Police Office (CCPO), ang insidente nahitabo Miyerkules sa gabii, Enero 14, samtang ang unom ka trabahante nagpadayon sa pagtaod og solar post sa maong lugar aksidente nilang nahikapan ang buhi nga kuryente. Dali nga nitubag ang mga rescuers ug mga medical team aron hatagan og unang tabang ang mga biktima.
Sumala sa report, ang mga grabeng naapektuhan mao sila Wantong ug Loloy, mga residente sa Catmon, Cebu, nga maoy nagkupot sa poste sa dihang kini aksidenteng natandog sa high-voltage power line, hinungdan sa kusog nga kuryente nga nakaigo kanila ug sa ilang kauban.
Ang uban pang mga naangol mao sila Jayson Montañez nga taga Sibonga, Christian Guiwanon ug Silvestre Montejon nga taga Catmon, ug Regan Viagedor, 27 anyos, taga Tabuelan. Ang ilang kahimtangan giila nga dili grabe ug padayon ang pagmonitor sa mga doktor.
Mipahimangno ang mga awtoridad sa mga kontraktor ug trabahante nga lig-onon ang safety measures ilabi na sa mga proyekto nga duol sa mga linya sa kuryente, aron malikayan ang susamang trahedya ug masiguro ang kaluwasan sa mga nagtrabaho.
I via Renante Socia Lada