Nagsugod na ang Goberno sa lalawigan sa Sugbo sa pagpangandam alang sa usa ka surgical mission nga ipahigayon sa Cebu Provincial Hospital (CPH)-Carcar isip kabahin sa pagsaulog sa ika-457 nga Foundation Anniversary sa Probinsya sa Sugbo. Mahitabo kini pinaagi sa pakigtambayayong sa surgical team sa University of Cebu Medical Center (UCMed).
Nagpahigayon og coordination meeting ang mga hingtungdan aron hisgotan ug pinalon ang mga plano alang sa medical outreach. Ang operasyon pangunahan nila Dr. Armando Tan ug Dr. Maribel Du sa UCMed.
Mitambong usab sa tigum sila Dr. Daisy Abarquez, Chief of Clinics sa CPH-Carcar, Chief Nurse Teresita Blanco, Dr. Shiela Faciol ug ang iyang grupo gikan sa Provincial Health Office, ingon man ang mga representante sa City Government of Carcar.
Matod ni Dr. Nikki Catalan, consultant sa Capitol Piso Health, importante ang hapsay nga koordinasyon aron masiguro nga masuta pag-ayo ang mga pasyente, maandam ang mga pasilidad ug kahimanan, ug luwas ug episyente ang paghatag sa serbisyong medikal.
Ang iskedyul sa pre-screening ug uban pang detalye sa surgical mission ipahibalo sa umaabot nga mga adlaw.
I via Renante Socia Lada