Nagpadayon ang Cebu Provincial Government sa paghatag og tabang sa mga habal-habal driver sa Compostela ug Liloan tungod sa pagsaka sa presyo sa gasolina.
Kagahapon Agosto 18, 1,532 ka driver sa Compostela ug 1,981 ka driver sa Liloan ang nakadawat og ₱3,000 cash ug 10 kilos nga bugas matag usa.
Apil sa paghatag sa ayuda si Cebu Governor Pamela Baricuatro. Sa duha ka lungsod, mikabat na sa 6,361 ka habal-habal driver ang nakadawat sa tabang.
Matud sa mga mayor sa Compostela ug Liloan, dako kini nga tabang sa mga driver nga naapektuhan sa pagsaka sa presyo sa gasolina ug mikunhod nga kita.
Ang bugas gikan sa “Bigay Bigas sa Masa” program sa national government, nga gitumong sa pagtabang sa mga kwalipikadong benepisyaryo, lakip ang mga habal-habal driver.
Segon ni Governor Baricuatro, ang mga driver angayan tabangan tungod kay importante ang ilang serbisyo sa pagdala sa mga tawo ug produkto sa komunidad.
I via Renante Socia Lada