Ang Cebu Provincial Government mopahimutang sa bayad sa transport ug logistics aron makakuha og daghang suplay sa National Food Authority (NFA) rice, isip lakang sa paglig-on sa food security ug paghatag og barato nga bugas sa mga sektor nga nagkinahanglan.
Sumala ni Governor Pamela Baricuatro, ang probinsya nagtinguha nga maka apod-apod og 20,000 ka sako nga bugas nga ibaligya sa ₱20 kada kilo sa mga marginalized sectors sama sa indigents, senior citizens, solo parents, persons with disabilities, ug minimum wage workers. Gidugang niya nga andam ang probinsya mo-cover sa hauling ug transport gikan sa source regions aron masiguro nga maabot ang mga lungsod ug siyudad.
Gipahibalo ni NFA-7 Acting Regional Manager Liza Balagot sa gobernador nga ang NFA central office unang nag-allocate lang og 2,000 sako para sa Cebu, apan ang probinsya nangayo og 20,000 sako aron matubag ang panginahanglan.
Posible usab nga makakuha pa og dugang supply gikan sa Regions 4 ug 6. Gi-direct ni Gobernador Baricuatro ang Provincial Agriculture Office (PAO) nga dayon ipadala ang bugas pag-abot aron malikayan ang delay ug pagkadaut.
Sumala kay Assistant Provincial Administrator Aldwin Empaces, ang programa kauban ang partnership sa Food Terminal Inc., ug magpadayon depende sa suplay sa bugas. Ang kwalipikadong beneficiaries makapalit og hangtod 30 kilos kada bulan, maximum 10 kilos per transaction; ang mga mag-uuma hangtod 50 kilos, samtang ang mga mananagat 10 kilos lang.
Kinahanglan magpakita og valid ID gikan sa ilang sektor aron makabenepisyo. Ang programa magsugod sa Abril 15 ug kabahin sa subsidized rice initiative sa national government.
Source: Cebu Province PIO
I via Renante Socia Lada