Nagpositibo sa ilegal nga drogas ang siyam ka drayber atol sa kalit nga drug testing nga gihimo sa Philippine Drug Enforcement Agency Region 7 uban ang Land Transportation Office ug Land Transportation Franchising and Regulatory Board. Ang operasyon gipahigayon sa mga terminal sa Cebu City isip kabahin sa pagpahugot sa seguridad karong Semana Santa.
Sa 409 ka drayber ug konduktor nga gi-test, 204 gikan sa South Bus Terminal ug 205 gikan sa North Bus Terminal. Siyam ang nagpositibo sa shabu, walo gikan sa South Bus Terminal nga naglangkob sa tulo ka taxi driver ug lima ka bus driver, samtang usa gikan sa North Bus Terminal nga taxi driver.
Matud ni PDEA-7 RD Joel Plaza, kinahanglan pa moagi sa confirmatory test ang mga nahimong positibo aron makumpirmar ang resulta. Kung mapamatud-an, ipasa sila sa lokal nga gobyerno alang sa angay nga aksyon ug rehabilitasyon.
Gipasidaan sa LTO nga posible kanselahon ang lisensya sa mga drayber nga mapamatud-ang naggamit og ilegal nga drogas, samtang ang LTFRB nag-ingon nga mahimo usab silotan ang mga operator. Nagpadayon usab ang higpit nga inspeksyon ug checkpoint aron mapanalipdan ang mga pasahero sa pagbiyahe niining Semana Santa.
📸 Contributed
I via Renante Socia Lada