Sugod alas-12:01 sa kaadlawon sa Pebrero 18, 2025, gimandoan ang Solid Earth Development Corp. (SEDC) nga hunongon ang tanang operasyon sa pagpangkubkob ug trabaho sa yuta sa Munisipyo sa San Fernando.
Kini base sa Executive Order No. 6, series of 2025, nga gipagula ni Gobernador Gwendolyn Garcia, nga magpabiling epektibo sulod sa 30 ka adlaw. Ang maong mando gitumong alang sa kasiguruhan sa publiko ug kaayuhan sa kinatibuk-ang komunidad.
Gibutyag sa Gobernador nga gikinahanglan nga ipalig-on ang miaging mando aron magpadayon ang environmental audit, tukmang risk assessment sa maong lugar, ug ang pagtino sa carrying capacity sa Mineral Production Sharing Agreement (MPSA) nga mga lugar nga gigamit sa SEDC.
Ang SEDC usa ka kompaniya sa quarry nga nag-suplay sa panginahanglan sa semento sa Taiheiyo Cement Philippines. Ang MPSA usa ka kasabutan tali sa Gobyerno ug usa ka mining company nga nagtugot sa kompanya sa eksklusibong pagpahigayon og pagmina sa maong lugar, diin ang Gobyerno adunay bahin sa gross output.
Ang maong EO nagpakita sa baruganan sa Kapitolyo nga unahon ang seguridad sa katawhan ug ang panalipod sa kinaiyahan labaw pa sa kita sa mga dagkong kompanya.
(Renante Socia Lada)
(Source: Cebu Provincial Capitol PIO)