Gisugdan sa Cebu Provincial Government ang selebrasyon sa Solo Parents Week pinaagi sa usa ka adlaw nga puno sa kalihokan alang sa solo parents didto sa Capitol kagahapon Abril 20. Tumong niini nga hatagan og importansya ug pasidungog ang mga ginikanan nga nag-inusara sa pagpadako sa ilang mga anak.
Ang maong selebrasyon kabahin sa Expanded Solo Parents Welfare Act ug gilusad pag-usab human sa unom ka tuig nga wala kini napahigayon. Gipangulohan kini sa administrasyon ni Gobernador Pamela Baricuatro.
Sa pakigtambayayong sa Provincial Social Welfare and Development Office, gihimo ang kalihokan nga adunay tema: “Hindi ka Nag-iisa sa Iyong Pag-iisa: Yakap at Kalinga para sa Solo Parent.” Gipasidunggan niini ang kalig-on, dedikasyon, ug sakripisyo sa mga solo parents nga nagpadayon sa pag-atiman sa ilang pamilya.
Apil sa mga kalihokan ang poster-making contest para sa mga ginikanan ug anak, TikTok dance presentation, ug ang Solo Parent Got Talent 2026 nga nagpakita sa talento sa mga partisipante. Aduna usab forum nga nagtudlo bahin sa pagdumala sa kwarta, budgeting, ug negosyo.
Pinaagi sa tibuok semana nga selebrasyon, gipakita sa probinsyal nga gobyerno ang padayon nga suporta ug paghatag og mga programa alang sa solo parents sa Cebu aron matabangan sila sa ilang adlaw-adlaw nga panginabuhi.
Source: Cebu Province PIO
I via Renante Socia Lada