Nagkakusog na ang pagpangandam para sa Association of Southeast Asian Nations Leaders’ Summit nga ipahigayon karong Mayo, samtang hapit na moabot ang mga lider ug delegado gikan sa 11 ka miyembrong nasud. Gilauman nga modagsa ang mga bisita sa Cebu sulod sa sunod nga mga semana.
Sa Mactan-Cebu International Airport, gipakita sa mga opisyal ang ilang kahimtang sa kaandam, lakip na ang bag-ong giayo nga General Aviation area. Importante kini nga pasilidad aron mudawat sa mga VIP ug dignitaries nga moabot sa probinsya, kauban sa Terminal 2 sa airport.
Ang pagpangandam alang sa ASEAN usa ka panaghiusa sa national ug local nga mga ahensya. Apil niini ang tulo ka siyudad—Cebu, Lapu-Lapu City, ug Mandaue City—uban sa Provincial Government sa Cebu nga gipangulohan ni Gobernador Pamela Baricuatro, nga mao usab ang chair sa Cebu Organizing Committee.
Niadtong Abril 16, nagpahigayon og coordination meeting ang ASEAN National Organizing Committee–Cebu Organizing Committee aron susihon ug ipahiangay ang tanang pagpangandam sa nagkadaiyang sektor. Tumong niini nga masiguro nga walay kakulangan sa mga preparasyon sa maong dakong kalihokan.
Padayon ang paspas ug organisadong lihok sa Cebu aron masiguro nga andam kini sa pagdawat sa mga lider sa ASEAN ug mapakita ang probinsya sa tibuok kalibutan isip usa ka maayong host sa international nga kalihokan.
Source: Cebu Province PIO
I via Renante Socia Lada